KECEK KITO AJO: Mati Kutu

 

 

RADARBENGKULUONLINE.COM - Tahun baru ko Ujang sedi nian. Bukan do idak dapek mete. Tapi, nyo tu idak bulih kek Andung keluar rumah. Temasuk  kulu kilir kek metenyo. Ujang lah bejanji sebentar ajo. Tapi idak dapek amplop. Eh, maksudnyo dapek ampun.

Sebenarnyo Ujang ciknan nian bekumpul kek metenyo, kek kawan-kawanyo sambil nengok orang main kembang api. Apalagi malam tu cuacanya elok nian. Idak ado badai, apolagi ujan. 

 

Andungnyo tu memang lah lamo melarangnyo pai. Katonyo, idak elok ngadokan tahun baru tu sambil mbakar kembang api. Itu bukan adat  kito. Tetapi budaya non muslim. Idak langsai kek kembang api tu. Lemaklah makan bakso. Eh, mano pulo larinyo ko.

 ‘’Ambo nggak nengok cucung ambo pesta kembang api kek tobo banyak tu. Itu samo kek nyembah api. Nyembah api tu dilarang agomo kito. Kalu ndak jugo merayokan tahun baru, yo caro Islam lah. Caronyo, yo merenung sambil ngingek apo nang lah kito kerjokan dan nyusun rencana nang lebih elok untuk tahun baru kelak. Yasinan , boleh jugo. Nang penting, tahun baru ko harus lebih elok kek sebelumnyo. Kalu samo atau menurun, itu namonyo merugi,’’kecek Andung beiyo-iyo sambil mindahkan suginyo jak sepiak kanan kek sepiak kiri.

 

Ujang sebenarnyo lah ngecek itu idak zamanyo lagi. Lah kuno. Lah ketinggalan zaman.

’’Yak Ndung, tobo ko lah bedoro segalo ke Pantai Panjang. Maso ambo betelur di rumah ajo. Kini bukan zamannyo lagi kito merenung,’’kecek Ujang cak macak.

 

‘’Biarlah tobo tu cam tu. Kito jangan. Kito tu jangan niru nang idak elok. Kalu niru jugo, itu namonyo pandir,’’kecek Andung ngencang. Idak ndak ngalah. Nggut suginyo ampir melompek ke muko Ujang.

Ndengar gaek tu ngencang, Ujang idak banyak ngecek lagi. Nyo diam ajo sambil otaknyo berpikir jauh. 

 

Sudemnyo pikir-pikir, apo nang dikecek Andung tu ado benarnyo jugo. Pak ustad jugo ngato cam tu. Kini ko lah payah nian membedakan mano nang elok, mano nang idak elok. Idak anak bujang ajo, orang tuo jugo cam itu. Tobo tu banyak nang merayokan tahun baru ko. Temasuk pejabat di daerah ko.

Sedang bepikir cam tu, kawanyo idak berenti ngirim SMS. Tiok sebentar SMS bebunyi masuk ke HPnyo. Ujang pekau ke SMS itu. Andung, Inga, Dodo, Mak, Bak jugo cam itu. Isinyo, intinyo tu nggak Ujang kumpul besamo di Pantai Panjang.

 

‘’Yak Jang. Marolah ke Pantai Panjang. Kelak abis kambing guling ko.’’Itulah bunyi salah satu SMS nang diterimo Ujang dari Buyung.

Nengok isi SMS cam itu, air liur Ujang netes. Nyo cik nan nian makan daging kambing tu. Nyo lah lamo nian idak makan daging kambing tu.

 

BACA JUGA:Positif dan Layak Didukung, SE Tentang Azan dan Salat, Harusnya untuk Seluruh Muslim di Mukomuko

‘’Kelak dulu Yung. Lagi tanggung. Ambo lagi asyik nonton acara tivi ko. Acara nyo elok nian. ’’ Cam itu isi SMS nang dikirim Buyung.

‘’Aponyo nang tanggung tu Jang. Idak sebagai tu. Jangan takut amek. Marolah ke Pantai. Kami nunggu kau tulah lagi.’’ Itulah isi SMS nang dibaleh Buyung.

 

Idak lamo, metenyo jugo ngirim SMS. 

‘’Woi Dang. Marolah betelur di rumah tu. Kito ke Pantai Panjang ajo. Ambo tunggu yo. Jangan takut amek kek Andung tu.’’

 

Nengok SMS Upik tu, Ujang kasihan jugo kek metenyo tu. Tapi, nyo idak pacak apo-apo. Kalu pai, pacak keno semprot Andung kelak. Apolagi tobo serumah tu lah kumpul galo makan jagung bakar sambil nonton tipi.

‘’Maaf Pik. Besok ajo yo kito pai besamo. Idak lemak pai. Kami ko lagi kumpul besamo sambil nonton tipi kek keluargo. Kalu ambo pai, apo kato tobo tu kelak.’’Itu isi SMS nang dikirim Ujang kek metenyo tu.

 

BACA JUGA:Manusia Api Benteng Disarankan Netizen Jadi Petugas Pemadam Bahaya Kebakaran

Karno metenyo idak berenti ngirim SMS, Ujang tepakso nelpon metenyo tu. Idak lemak didengar tobo se rumah tu, Ujang pai ke laman. Nyo kulu kilir di laman tu nelpon metenyo cak cacing kepanean.

‘’Hoii Jang! Ngapo kau tu cak cacing kepanean ajo. Duduklah disiko. Kelak abis jagung bakar, kue taat ko,’’kecek Andung sambil nengok kek Ujang.

 

Karno Andung masih manggilnyo, tepakso nyo tutup ajo telpon tu. Idak lemak kelak didengar metenyo tu.

’’Andung ko idak senang nian nengok orang senang,’’kecek Ujang sambil melantak  jagung bakar nang teletak di piring tu.